geguritan

LALI

Dening: Kus Tajianto

Sabenere kita asring gegojegan

Antaraning wong nonton layar tancep ing lapangan bal

Sabenere kita asring padudon

Antaraning gela karo lila

Sabenere kita bebareng ngejawantah ing palagan iki

Kaya banyu wantah sing mbokombe

Kaya omong kosong sing mbokrungu

Sabenere kita tan nate bener

Saliyane ngaku bener

Yen pinuju wengi

Aku nggagas

Apa garbane ibu ya elok kaya donya iki

Apa papane Gusti ya peni kaya plataran sing kebak cah-cah

Dolanan rumpetahun

Kapethik saka: Panjebar Semangat