geguritan

NOLEH MBURI

Dening: Sumono Sandy Asmoro

Noleh memburi

Nyawang bulakan sawah lan pategalan

Mandeg ijone suket lan gegodhongan

Ngulati impen kang nate gogrog

Sadawane dalan

Ing galengan iki sikilku nate kesandhung

Nalika kumricike banyu kalen

Gawe wirama kasepen

Nyawang abure kuntul bablas mangidul

Noleh memburi

Nyawang birune langit kan nyimpen

Lintang-lintang gumebyar

Ana kang dak rasa gothang ing alam gumelar

Nalika kembang arum dalu gogrog ing latar

Sadurunge cangkrimaning wengi rampung kababar

Noleh memburi

Nintingi dina-dina sepi

Mbatang cangkriman mangsa

Kang kebak petung lan tandha-tandha

Kapethik saka: Panjebar Semangat